Act 9 | MHL | STEP | Aria iir nain akena Sol-ke wi Yeesus teeria wia samorowa maemi wia ifakimem-miek. Naap onami pris woos mua wiar ikiwep maakek. Parosifa yiiwkin wi Yuuda lotu teeria wia ofakowami Yeesus opora wiar ookam-ikemik nain wia imenap-na wia opap Yerusalem wia pekapinen naep maek. Naeya parosifa unowa siisimep iwok. Ne o parosifa feekiya Damaskus ikiwok.

Acts 9

Sol kema kirep Yeesus opora wiar opak

1 Aria iir nain akena Sol-ke wi Yeesus teeria wia samorowa maemi wia ifakimem-miek. Naap onami pris woos mua wiar ikiwep maakek. Parosifa yiiwkin wi Yuuda lotu teeria wia ofakowami Yeesus opora wiar ookam-ikemik nain wia imenap-na wia opap Yerusalem wia pekapinen naep maek. Naeya parosifa unowa siisimep iwok. Ne o parosifa feekiya Damaskus ikiwok. 3 Ikiwemi Damaskus owowa mamaiya arem-ikaiwkin parina maneka-ke iinan-pa wilinemi Sol mikak. 4 Mikeya oos-pa tenep orop miiwa-pa inep ikok opora oko feenap miimak, “Sol, Sol, no moram anane yo efa samorowiw ikain?” Ne os-ke nokarek, “Aa Maneka, no naarewe-ke?” 5 Naeya maek, “Yo Yeesus-ke, yo efa samoram-ikain nain-ke. 6 No iikirap owowa fain eke. Neek ikaeya maa kamenap onowa nain nefa maakikuan.” 7 Ne wi mua Sol wameiya ikiwem-ikemik nain pun kema puep iwap popor maneka iimarurumep ikok aakunowa muutiw miimam-ikemik, wi mua-ko me urufamik. 8 Aria Sol iikirap mokoka wilinekam naep onak-na wia, mokoka foma pukok, maa me urufak. Ne wi wapena-pa opap Damaskus owowa pekamik. 9 Mokoka ewur me sariarek, fofa arow naap ikua ne maa pun me enem-ikua.

10 Aria Yeesus teeria mua-ko Damaskus-pa nan ikua, unuma Ananaiyas. Yiena Maneka-ke wiar imenarep farek, “Ananaiyas.” Ne os-ke maek, “Maneka, yo fan ikem.” 11 Ne yiena Maneka-ke maakek, “No iikirap era unuma Tiinowa naimik nain ooke. Ookap Yuudas koora wiar ikiwep mua oko-ko urufinan, mua nain unuma Sol, ona owowa Tasus. O yo efa kema suuwap farem-ikaiya. 12 Naap ikok mokoka-keriw kirep mua unuma Ananaiyas naimik nain urufak. Os-ke ekapep wapena ikiwosa iinan-pa efar wueya mokoka wilinep maa urufak.” Naap maakek. 13 Naeya Ananaiyas-ke maek, “Ae Maneka, mua unowa naap maiwkin miimam, mua nain Yerusalem-pa wi emeria mua no opora nefar opimik nain sira samo-samora wia oniya naimik. 14 Wi pris woos mua-ke kekanowiwkin parosifa wiar aawep ekapok. Ne nena teeria owowa fan ikemik nain wia opap koora-pa wia wuekam naep ekapok.”

15 O naap maeya yiena Maneka-ke maakek, “No eliw wiar ikiwinan, yena uuwow mua arinok naep pepekimep-puam. Os-ke ikoka yo unuma ne meta wi owow unowa ne owow saria mane-maneka ne wi Isrel emeria mua wia maakeya yo efa paayarikuan. 16 O yo uuwowa oni-ikiwem-ikomeya yo unuma muuta nain samoram-ikaikuan. Naap oniwkin amisarep mainon, ‘Yo Yeesus uuwowa-pa sirirowa aawiyem.’ Naap mainon.” 17 Ananaiyas naap miimap ikiwok. Ikiwep koor kemena wiar urupep wapena Sol ikiwosa-pa wiar wuami maek, “Emar, no Yeesus era-pa nefar imenarek nain-ke efa sesekeya ekapem. Naapeya aakisa no mokoka wiline. Mua Maneka Ewar Eliwa no nefa kekanowinok.” 18 Naap maeya maa oko mera nira saarik nain-ke Sol mokoka-pa tenep orok. Ne maa urufak. Ne iimarep ikaeya eka-pa yasuwak. 19 Maa onakiwkin enep mia toonek.

Sol Yeesus opor eliwa wi Damaskus wia maakem-miek

Sol sariarep fofa papako Damaskus owowa-pa wi Yeesus opora opamik nain wiamiya ikua. 20 Nan ikok wi Yuuda lotu koora wiar ikiwep Yeesus opora maemi naap wia maakem-ikua, “Yeesus-na Mua Maneka Muuka-ke.” 21 Ne opora naap wiar miimap samor-ko soranemi maemik, “Mua faa, o iiriw Yerusalem-pa wi Yeesus opora ookimik nain wia samoram-ikua. Ne aakisa i owowa yiar ekapep wi Yeesus unuma farimik nain pun wia opap ikiwep wi pris woos mua wapena-pa wia wuinen naep naem-ikua, mua nain-ki e kamenap? Ne aakisa moram naap maiya?” 22 Aria Sol opora wia maakem-ikua nain kekanowa onaiya ikua. Yeesus iiriw Mua Maneka-ke sesekeya miiwa orok nain baliwep akena wia ookomak. Naeya wi makena naemik, nain wi kema irakem-ikemik.

Wi Yuuda Sol ifakimu naep oniwkin baurarek

23 Aria fofa unowa weesereya wi Yuuda-ke Sol ifakimu naep wiam fiirimep opora anumamik. 24 Ne mua papako-ke opora wiar miimap Sol seewa opamik. Aria wi Yuuda mua unowa o ifakimu naep owow pika omopor unowa nain uura amirika naap wuap ikemik. 25 Wi naap ikaiwkin iir oko uura Sol teeria-ke inera maneka-pa wuap ifariw pika wuara-pa fuurkiwkin epa maneka oromi baurarep ikiwok.

Banabas-ke Sol asipami wi aposel wiar pikiwok

26 Sol baurarep ikiwep Yerusalem kererek. Nan ikok wi Yeesus opora opimik nain teeria wiar ekekam naep onak-na wi keker opamik. O Yeesus opora wiar opiyem maek nain wadolaliya naemik. 27 Ne aria Banabas-ke ekapep o aawep wi aposel wiar pikiwok. Ne o yiena Maneka era-pa wiar imenarep opora maakek nain wia maakek. Ne Damaskus owowa-pa ikok keker opowa marew Yeesus opora wia maakem-ikua, nain pun wia maakek. 28 Naap wia maakeya wi Sol aawep Yerusalem owowa-pa owawiya soomaremi mauwam-ikemik. Ne o keker opowa marew Yeesus unuma-pa Mua Maneka opora wia maakem-ikua. 29 Ne wi Yuuda Grik opora aakunimik nain oporiw wiamiya irakeya o ifakimu naep onamik. 30 Naeya wi Yeesus opora opimik nain-ke miimap o wiim-ikiwep Sisaria owowa-pa nan Tasus owowa sesekamik.

31 Aria wi Yeesus opora opimik nain Yuudia ne Galili kame-pa ikemik nain baliwep ikemik. Ne wi Samaria kame-pa ikemik nain pun baliwep akena ikemik. Ewar Eliwa-ke wia kekanoweya eliw ikemik. Naapeya wi emeria mua papako wi teeria wiar ekam-ikaiwkin teeria wiar manekarem-ikua. Wi Mua Maneka keker opap o opora ookowa kemaiw ikemik.

Pita Ainias saliwak

32 Aria Pita owow unowa-pa mauwami Lida owowa wiar ikiwok, wi Yeesus opora opimik nain wia urufowa naep. 33 Ne mua oko owowa nan urufak, mua nain unuma Ainias. O aka umep soomarowa marew, oram esimsa-pa inepiw ikua. Napuma aawok nain mokoma ikur okaiwi-pa arow. 34 Ne Pita-ke maakek, “Ainias, Yeesus Krais-ke nefa saliwak. No iikirami nena maa unowa saliwe.” Naap maakeya iikirak. 35 Ne wi Lida ne Saron naap urufap kema kirep Yeesus opora wiar opamik.

Pita Tabita umep ikua nain iikirowak

36 Aria Yoopa owowa emeria oko nan ikua, unuma Tabita. (Grik opora-pa kiripami Dokas naemik). Emeria nain Mua Maneka opora opap sira eliwa onam-ikua. Wi maa marewa nain wia asipam-ikua. 37 Ne iir oko-pa napum maneka aawep umok. Umeya ona sawi napuma wiar saliwap ona koor kemena iinan samapora-pa inawap-puamik. Ne wi Yoopa Yeesus opora opimik nain Pita Lida owowa-pa ikua nain meta miimamik. 38 Yoopa Lida owowa mamaiya-pa ikua. Meta miimap mua wiam erup wia sesekamik, ikiwep Pita aawep ewur akena pekapuk naep.

39 Wi ikiwep maakiwkin wiokak. Fuuneya aawep iinan samapora purupemik. Purupiwkin wiamiya iimarep ikaeya emer apura papako-ke omemi konima ne mia suuwowa iiriw Dokas wia warem-ikomak nain ofakowamik. 40 Ne Pita-ke wi nain wia iirarek. Oraiwkin ona waisow ikok keema muuna mikap Mua Maneka farek. Naap onap-puap kirep emeria nain unuma unufami maakek, “Tabita, no iikire.” Naap maakeya emeria nain mokoka wilinep Pita urufami iikirap pokak. 41 Ne Pita-ke asipami wapena-pa opap iikiroweya iikirap iimarek. Ne Pita wi Yeesus teeria nain ne wi apura wia faremi wia maakek, “Dokas kiiriw iikirap fan ikua.” 42 Aria opora nain Yoopa owowa meta manekareya emeria mua unowa kema kirep Yeesus opora wiar opamik. 43 Ne Pita ikiwep Saimon koora-pa wiar inem-ikua. Saimon-na maa eneka kanima saliwow mua-ke.